سلسلة مقالات
حكايات الحجة (6)

سارة بنت محمد حسن

حكايات الحجة
.~.~.
شبهات حول المرأة ووضعها في الإسلام

(1)
.
-- يابنتي قولي لي هنا بقة
ليه الراجل ينفع يتجوز أربعة والست لا؟
.
- يا حاجة
الراجل ممكن يصرف على أربع بيوت ...أيه رأيك الست تقدر تخدم أربع بيوت؟؟
- لا يابنتي ولا بيتين
.
- الراجل ممكن يعاشر أربع ستات الست تقدر على كدة؟؟
- لا يابنتي دي تموت
؟
- الست لما تحمل هتنسب الولد لمين؟
- اه والله عندك حق
.
- عارفة يا حجة مين اللي ممكن تعيش مع كذا راجل؟؟
مين يابنتي؟؟
اسألي الله العافية : الغواني محترفات الزنا اللي مش عاوزة يكون لها بيت وأسرة وعيال واستقرار ...ووقتها تنسب العيال لأي حد مش فارق زي ما كان على أيام العرب الجاهليين وجه الإسلام " نظفهم"
وزي ماهو في الغرب الجاهلي الحالي..وأول ما بتسلم المرأة منهم بتقول بعلو حسها: أنا بقيت نظيفة حقا!
نظافة حسية ومعنوية وتعني كل حرف فيها

.~.~.~.~.~.~.~.~.~.~.~.~.~.~.~

(2)
- إلا قولي لي يابنتي
- نعم يا حجوجة
- اشمعنى الراجل ينفع يبقى إمام المسلمين خليفة يعني ورئيس جمهورية وكدة والست لا
وليه بقة ينفع يكون قاضي والست لا
.
- شوفي يا حجة متزعليش مني من الدخلة دي ..بس وربنا احنا ناقصات عقل بالسؤال ده
عمرك شفتي حد بيستشرف الحمل الثقيل إلا اللي معندهوش عقل أصلا مش بقة ناقص؟؟
.
- ... أيه يابنتي ده عيب كدة
.
- مانا قلت لك متأخذنيش مانا مفروسة يا حاجة
عديهالي وركزي معايا من فرستي ...من قهرتي.. سيبيني أعبر ده حتى حرية التعبير مكفولة للجميع ...جت عليا
.
- طيب طيب كفاية مش عبرتي ..كملي
.
- سمعتي عن حديث قاضيان في النار وواحد في الجنة؟
.
- اه سمعت
.
- أنا بحمد ربنا أنه مينفعش أبقى قاضي لحسن أكون من الي في النار
.
- طب مانا ممكن أكون من اللي هيدخل الجنة
.
- وليه يا حجة أسعى برجلي للحساب الثقيل؟؟ ما ربنا مخفف عليا وقالي مش واجب عليك أصلا ملكيش دعوة بالليلة دي
داحنا بنقرأ صفحة الفقه ثاني يوم بننساها هتذاكري أيه ولا أيه ولا أيه عشان تبقي قاضي وتحكمي بالعدل
وبعدين يا حجة تبقي قاضي بشنبات مفكيش ريحة الأنوثة ولو حملتي وأنت تعبانة ومتزرزرة هتبقي قاضي عدل ولا قاضي مش طايق نفسه؟؟
ولاهتاخدي أجازة من القضاء وترجعي بعد 9 شهور و6 رضاعة على الأقل تكوني نسيتي الفقه على القانون على أي شيء له علاقة بالقانون ..ولا هتحرمي نفسك من نعمة الأمومة وحضن ولادك عشان متنسيش القضاء
ولا هتبقي قاضي جاهل ولا قاضي صاحب هوى
.
- اه والله صحيح عندك حق
بس أنا عاوزة أبقى خليفة المسلمين..
.
- لولا أن اللطم حرام يا حاجة ..يالا أستغفر الله
تعرفي حديث الإمام العدل؟؟ والإمام الظالم اللي بيجي يوم القيامة شقه مائل؟؟
سمعتي أن الصحابة والصالحين كانوا أصلا بيفروا من القضاء والإمامة والولايات؟؟
كانوا بيخافوا من ربنا يا حاجة
وعارفين أنه تكليف تكليف شديد أوي مش تشريف
ده غير بقة يا حاجة لو انت فطرتك تقبل أنك يكون جوزك جوز الست هانم رئيس الجمهورية ...تبقي محتاجة علاج نفسي يا حاجة ...فطرتك لو حاكمتيها تقولك عاوزة أكون ست متزوجة راجل : فطرتك بتقول أنا تابع سعيد بتبعيته لراجل له قوامة حقيقية يشعرني بأنوثتي ..مش رجل كالنساء وأكون أنا راجل البيت!
.
- طيب يابنتي بس يسيبوني أؤمهم في الصلاة
.
- واقبحااااااه
تسجدي وتركعي أمام الرجال يا حاجة؟؟ وهم هيصلوا ولا هتنفتنيهم في الصلاة؟؟
زينة المرأة الحياء