سلسلة مقالات
حكايات الحجة (2)

سارة بنت محمد حسن

حكايات الحجة
- هو أنت يابنتي حد يزعل منك؟؟ ده أنت عسل وسكر
-- يا حجة ده مش مدح ...ده قمة الذم
اللي محدش بيزعل منه أبدا : المنافق اللي بيراضي الناس كلهم على حساب معتقداته وأفكاره

============

حكايات الحجة
- ياااااه يابنتي الحدود دي وحشية حاجة صعبة أوي
يقطعوا إيد واحد عشان سرق؟؟؟ ليييييييييه يعني؟؟
-- حجة يا حجة
- نعم يابنتي؟؟
-- لما تكونــ(ـي) طفحانــ (ـة) الدم طول الشهر وراجعــ (ـة) وأنت لسة قابضــ (ـة) المرتب وعيالك وراهم طلبات أد كدة وأنت في أمس الحاجة لكل قرش مش جنية
وبعدين ينشل فلوسك واحد حرامي
بالله عليك لو مسكتيه هتعملي أيه؟
- هقطع رقبته ورقبة أبوه وأمه واللي يدافع عنه
-- ربنا رحيم
أمر بقطع يده فقط ..عشان ميعملهاش تاني وعشان غيره يرتدع

قال بعض الأدباء "هؤلاء الفلاسفة الذين يتكلمون عن أن العالم وهم وأن الألم وهم سيكفون عن تفلسفهم عند أول لسعة من طرف سيجار مشتعل بين أصابعهم " اهـ بتصرف يسير

** التنظير والفلسفة حلوة مفيش كلام..بس لما متوصلش لينا

الحدود رحمة

هل تعلم أن الحدود مكفرة لذنب الفاعل؟
لما ثبت في الصحيحين عن عبادة بن الصامت قال: كنا مع رسول الله صلى الله عليه وسلم في مجلس، فقال: تبايعوني على أن لا تشركوا بالله شيئاً، ولا تزنوا، ولا تسرقوا، ولا تقتلوا النفس التي حرّم الله إلا بالحق، فمن وفّى منكم فأجره على الله، ومن أصاب شيئاً من ذلك فعوقب به، فهو كفارة له، ومن أصاب شيئاً من ذلك فستره الله، فأمره إلى الله إن شاء عفا عنه، وإن شاء عذبه. متفق عليه.

هل تعلم أن الحد رادع للمجتمع عن فعل الفواحش؟
والحدود على خلاف الفكر الهلامي عند أكثرنا هي على بعض الأفعال التي تضر بالمجتمع ضررا بالغا بحيث يدرك العاقل أن الحدود تمنع شر ومفاسد أكبر بكثير من إقامة الحدود

هل تعلم أن الحدود لها شروط في تطبيقها وليست سبهللا
وأنها تقام في إطار من الرحمة
ففي حديث رجم الغامدية أَمَرَ بِهَا نبي اللَّهِ -صلى الله عليه وسلم- فَشُكَّتْ عَلَيْهَا ثِيَابُهَا ثُمَّ أَمَرَ بِهَا فَرُجِمَتْ ثُمَّ صَلَّى عَلَيْهَا فَقَالَ لَهُ عُمَرُ تُصَلِّى عَلَيْهَا يَا نبي اللَّهِ وَقَدْ زَنَتْ فَقَالَ « لَقَدْ تَابَتْ تَوْبَةً لَوْ قُسِمَتْ بَيْنَ سَبْعِينَ مِنْ أَهْلِ الْمَدِينَةِ لَوَسِعَتْهُمْ وَهَلْ وَجَدْتَ تَوْبَةً أَفْضَلَ مِنْ أَنْ جَادَتْ بِنَفْسِهَا لِلَّهِ تَعَالَى" رواه مسلم

----------------------

حكايات الحجة
كثير من الستات تقولك بلسان الحال أو المقال مثل هذه الأقوال وأكثر
^^^^^^^^^^^^^^^^
^^^^^^^^^^^^^^^^
-- يا بنتي معنديش مشكلة أن زوجي يمشي مع ستات بس ميتزوجش عليا
========
-- يا بنتي معنديش مشكلة أن زوجي يكون مش بيصلي طالما بيقولي كلام حب وبيجيبلي الي أنا عاوزاه
========
-- يا بنتي خلعت الحجاب عشان أرضيه ..بس برضه بيبص بره
========
-- يابنتي النمص أنا فضلت أدور لحد ما جبت فتوى بأنه حلال عشان أرضي زوجي بس برضه مش بعجبه وطول النهار بيقول عليا وحشة
=======
-- يابنتي مقدرش مقعدش مع أصحابه اما يزرونا بيزعل مني مقدرش أقوله لا هيبقى نكد
======
-- ياااه نفسي يقولي كلمة حلوة - نفسي يحبني بجد - ده طول النهار بيشتكي وبيعترض وبيهزاني وبيذلني وبيقولي فاشلة

يا حجة :
مرة من نفسك كوني مع الله بصدق في ترك المعصية وعمل الطاعة ولو غضب زوجك اصمدي وقولي قولا حسنا ...وقلبه بيد الرحمن
مرة من نفسك استعيني بالله على قلب زوجك وعقله ولسانه في ركعتين بدل الغيبة والنميمة والشكوى منه ليل نهار وقعدات الحريم وتخبيب الستات على أزواجهم والت والعجن الي لا بيودي ولا بيجيب
مرة من نفسك استعيني بالله على مشقة البيت والأولاد والزوج بدل الندب واللطم
أصلح ما بينك وبين الله يصلح ما بينك وبين الناس
حتى لو لم يصلح ما بينكما ابتلاء هل تشكري أو ...؟؟...أجرك محفوظ ...بلاش تضيعي دنيا وآخرة

---------------------

حكايات الحجة
- انت مزهقتيش يابنتي من كل شوية تقولي لا أضيف الرجال ..وبرضه يضيفوك؟
- زهقت يا حجة
- وهتعملي أيه يابنتي؟؟
- مش هقول تاني لا أضيف الرجال ياحجة ولا هكتب بوست عن الموضوع تاني يا حجة ...وهحذفهم من سكات وأعمل نفسي مش مستغربة ولا شيء
الي نتعلمه من الحوار ده أيه؟؟
اعمل في صمت وبطل كثر كلام
الدغ ومتقولش أنك تعبان
ابتسم ببراءة واعمل اللي أنت عاوزه
بس هو يعني ..
أنا لما كنت بكتب بوستات مش بضيف الرجال كان عشان تتحمسوا متضيفوش الرجال

===============

حكايات الحجة
موحشتكوش؟؟؟
- يا بنتي الراجل غاندي ده كان راجل قوي وزي الفل ""الله يرحمه""
يا حجة قوليلي
- نعم يابنتي
- تعرفي أبا ثعلبة الخشني؟؟
- لا
هو أنت يا حجة كدة مش عارفة غير غاندي؟؟ ومش فخورة غير بغاندي...إنما حتى اسم الصحابي مش عارفاه
أعمل فيك أيه يا حجة؟؟
طبعا ده غير أنه ميفعش تقول عليه الله يرحمه ...

=============

حكايات الحجة
-- هو يا بنتي البخاري ده أنتو لسة بتستشهدوا بيه؟؟
مش طلع عنده أحاديث ضعيفة؟؟
- أنت تعرفي اسم البخاري يا حجة؟؟
- لا... باين اسمه محمد؟؟
- تعرفي اسم صحيح البخاري يا حجة؟؟
- لا يابنتي اسمه صحيح البخاري باين
- تعرفي ليه سموه أمير المؤمنين في الحديث يا حجة؟؟
لا يابنتي.... هو كان خليفة ولا أيه؟؟
طب شوفي مكان طرواة كدة تقعدي فيه يا حجة الله يكرمك ومتتكلميش تاني عن البخاري
----
مما قد لا يعرفه البعض عن البخاري وصحيحه
صحيح البخاري اللي هو كل اللي فيه أحاديث صحيحه مش هو الكتاب الوحيد اللي ألفه البخاري
لا فيه كمان الأدب المفرد - خلق أفعال العباد ..وغير ذلك
بس اللي اشترط فيه البخاري أنه يكون كله صحيح :
الجامع الصحيح المُسند المختصر من حديث رسول الله - صلى الله عليه وسلم - وسننه وأيامه
وهو الشهير بصحيح البخاري
(وكونه مختصر يعني معنى كدة فيه أحاديث صحيحة مش في الكتاب ده ..ليه؟ لانه مختصر )
شغل مخك:
فيه كتاب صحيح كل اللي فيه صحيح تلقته الأمة كلها بالقبول
وفيه كتب للبخاري نفسه لا هو قال أن كل اللي فيها صحيح ولا حد قال أن كل اللي فيها صحيح
اشمعنى ده كله اللي قال عليه كله صحيح؟ والعلماء اقروا له بالفضل والسبق والمزية
أكيد اتعمل فيه شغل معين

ده غير أن شراح الكتاب ده أصلا تعبوا جدا عشان يفهموا ويشرحوا عناوين الأبواب بس وطريقة اختيار البخاري للأسانيد لدرجة أن ابن حجر شارح الصحيح اللي هو المفروض مختصر في مجلداااااااات

يبقى أما يجي حد يطعن لك في صحيح البخاري أو في حديث منه
اعرف أنه مش فاهم حاجة أصلا
وغالبا ميعرفش أن البخاري له كتب تانية مش مشترط فيها الصحة وأنها بتحتاج تحقيق وأنه هو نفسه ممكن يحكم على حديث فيها أنه ضعيف
فالموضوع مش خيار وفقوس وشغل عيال ..ده علم وشروط ومنهج يعتبر فخر الأمة الإسلامية اسمها علوم الأسانيد واصطلاحات المحدثين
وكل كتاب اتعمل من العلماء المحدثين القدامى حتى لو فيه نقد على صحيح البخاري كان بيوصل لنفس النتيجة : أن كل ما فيه صحيح!
مش هتلاقي حد يطعن في البخاري غير الشيعة وبعض طوائف الصوفية وأمثالهم من أهل البدع والمستشرقين طبعا وحاليا العلمانيين منضمين لحزب الحرب على صحيح البخاري
ولكن حفظ الله السنة بالبخاري وأمثاله لأن في حفظها حفظ للقرآن


البخاري لقبه أمير المؤمنين في الحديث شهد له العلماء بالسبق والتفرد وقال الإمام مسلم عنه: دعني أقبل قدميك يا أستاذ الأساتيذ وطبيب الحديث في علله
فالرجل كان درة من درر الدهر في علم الحديث لما نلاقي أنه بدأ يطلب علم الحديث وهو ابن 11 سنة .. وبعد قليل بعد ما بدأ يطلب الحديث إلا وبدأ هو يعدل على أساتذته ويردهم بذاكرته وكان لا يكتب الحديث ويحفظ المجلس بغير كتابة
اللي زي ده لما نقرأ أو نسمع عن مستواه نعرف أنه هو أهل أنه يراجع ورا الناس ولا يراجع الناس خلفه ولما نسمع بقة كيف صنف كتابه مش ممكن نسأل هل صحيح البخاري صحيح؟؟ ومع ذلك زي ما قلت لك يا حاجة الأمة عنايتها بالصحيح فوق الوصف

11 سنة دي اللي الواد بيلعب فيها في زماننا في الشارع وميعرفش مين هو البخاري ويكبر يبقى عنده 30 سنة وميعرفش مين البخاري ويقعد يحط رجل على رجل في أي تليفزيون ساقط يتكلم فيه بكلام أي كلام عن البخاري!!


من هو الإمام البخاري؟؟!
1- البخاري اسمه: محمد بن إسماعيل بن إبراهيم بن المغيرة بن بردزبة البخاري (اختصارا يمكن أن يقال هو : محمد بن إسماعيل البخاري )
كنيته: أبو عبد الله

2- اسم كتابه الصحيح: الجامع الصحيح المُسند المختصر من حديث رسول الله - صلى الله عليه وسلم - وسننه وأيامه

3- لماذا سمي بأمير المؤمنين في الحديث؟
لأن هذا الرجل كان نابغة فذ لم ير أحد مثله في الحفظ والاتقان ومن أشهر الحوادث المعروفة عنه

قصة الإمام البخاري مع محدثي بغداد مشهورة، ومذكورة في الكتب التي ترجمت له، وخلاصتها:
لما قدم البخاري بغداد أراد علماء الحديث فيها أن يمتحنوا حفظه، فأخذوا مئة حديث فقلبوا متونها وأسانيدها، جعلوا هذا المتن لذلك السند، وذلك السند لهذا المتن، وأعطوها لعشرة أشخاص، لكل شخص عشرة أحاديث.
وفي موعد الاجتماع قام رجل فأخذ يسأله عن حديث تلو الآخر من الأحاديث المقلوبة، والبخاري يقول: لا أعرفه، لا أعرفه، وهكذا حتى انتهى العشرة. فلما علم أنهم قد فرغوا التفت إلى الأول فقال: أما حديثك الأول فقلت كذا وصوابه كذا، وحديثك الثاني قلت: كذا وصوابه كذا، وكذا فعل بالأحاديث المئة على الترتيب، يذكر الحديث المقلوب كما سأل عنه صاحبه ثم يقول الصواب!! فأقر الناس له بالحفظ وأذعنوا له بالفضل.
قال الحافظ ابن حجر: ليس العجب من ردّه الخطأ إلى الصواب؛ فإنه كان حافظاً، بل العجب من حفظه للخطأ على ترتيب ما ألقوه عليه من مرة واحدة!!
ده كدة كلام مجمل
وعشان تفهم تفاصيل محتاج تاخد شوية مصطلح حديث
فمفيش داع تتكلم على حاجة مدرستش منها شيء

===========

حكايات الحجة
- شوفي بقة يا بت أنت ...لو الإسلام زي مانت بتقولي كدة يبقى أنا كافرة
- يا حجة حطي هامش ممكن يطلع كلامي صح ويبقى الإسلام كدة...وديتي نفسك في داهية يا حجة

قال تعالى:" فلا وربك لا يؤمنون حتى يحكموك فيما شجر بينهم ثم لا يجدوا في أنفسهم حرجا مما قضيت ويسلموا تسليما"
أوعي تفكري بطريقة لو هو ده حكم الشرع أنا كافرة بيه ....هتكوني زي ما قلتي عن نفسك

فكري بطريقة مهما كان حكم الشرع .... سمعت وأطعت وخضعت وسلمت لحكمك يارب ..أنت الملك العليم الحكيم سبحانك تحكم ما تشاء
"وقالوا سمعنا وأطعنا غفرانك ربنا وإليك المصير"

===========

حكايات الحجة

- اقعدي في بيتك ولا تخلعيش نقابك يا حجة
- بس ده فضل يا بنتي
- وماله يا حجة البحر يحب الزيادة...أنا مشفتش حد بيتنازل عن الزيادة في المال والمتع والدنيا
اللهم إلا الفضل في الدين ..بنبيعه ببلاش
ليه مش عارفة
===========

حكايات الحجة
- أوف أستغفر الله المنتقبات دول يا بنتي حاجة تقرف أنا مش ممكن ألبس النقاب
سوء خلق ولسان طويل مشرشر زي السكينة أعوذ بالله من غضب الله بينفروا الناس من الدين
وبعدين كسر عليها واحد بالعربية
راحت مطلعة راسها من الشباك &%$#$%#$@#$%^%#$%@#$
معلش الرقابة حذفت الحتة دي عشان سوء الألفاظ
صحيح يا ولاد هو العيب في النقاب ..ياي سوفاج بيخلي الأخلاق سيئة فعلا
قال تعالى :" أتأمرون الناس بالبر وتنسون أنفسكم وأنتم تتلون الكتاب أفلا تعقلون"
أفلا تعقلون؟؟
أفلا تعقلون؟؟
يارب ثبتنا على دينك "كله" الظاهر منه والباطن وحسن الخلق وحشمة المظهر كما تحب وترضى